نظام إمتحانات القدرات 2018 (فنون جميلة/تطبيقية/تربية فنية/نوعية)

/ إيه هو إمتحان القدرات؟

دة إمتحان بيقيس قدراتك فى كلية فنون جميلة او تطبيقية او تربية فنية ونوعية لمعرفة قدرات التخيل والإبداع يعنى من الأخر بيعرف إيدك تمشى فى الكلية ولا لا, ودة مش صعب نهائى بس عايز تدريب وتركيز كويس ومش شرط تكون رسام بيكاسو يعنى ولا يشترط موهبة فذة,
بس الاهم يكون عندك نسبة وتناسب وازاى تقدر تحول الشكل اللى قدامك او اللى متخيله لرسم فى الورقة ودة هنشرحه فى الموضوع دة.
وشرط أساسي علشان تدخل كلية فنون جميلة او تطبيقية او تربية فنية ونوعية انك تكون ناجح فى القدرات وجايب مجموع الكلية, وخلى بالك مش هينفع تكتبها في التنسيق او تحويل الا لما تكون ناجح الاول في القدرات
وطبعا مستقبل الكليات دى ممتاز جدا ومجالاتها تضمنلك الشغل في كل مكان وتقدر تسافر برة مصر بسهولة, ولازم تكون ممتحن وانت مخلص ثانوية عامة مينفعش تستنى النتيجة لان الامتحانات تكون خلصت,والامتحان مرة واحدة بس بعد انتهاء امتحانات ثانوى بتقدمله اونلاين

2/ إيه أنواعه؟

يعتبر إمتحان القدرات لفنون جميلة حاجتين عمارة وفنون ملهمش علاقة ببعض نهائى
انما فنون تطبيقية ليها امتحان واحد فقط وتربية فنية ليها امتحان واحد ونوعية ليها امتحان وعلى حسب كل كلية,
واما الكليات الخاصة ليها امتحان واحد على حسب الكلية زى تطبيقية 6 اكتوبر والتجمع الخامس واكاديمية الفنون والجامعة الالمانية.

3/إية نظام الامتحانين ل(فنون جميلة) وهل لازم أمتحن الأتنين؟

إمتحان عمارة فنون جميلة (لطلبة علمى رياضة بس) وبيأهل لقسم عمارة فقط
إمتحان فنون جميلة فنون (لطلبة علمى رياضة وعلوم وادبى) بيأهل لقسم جرافيك ونحت وتصوير وديكور ولكن قسم الديكور لعلمى فى كل الكليات عدا اسكندرية من ادبى.
امتحان فنون تطبيقية بياهل لفنون تطبيقية بكل اقسامها وتربية فنية بتاهل لتربية فنيه.

وممكن تختار أى حاجة بس المهم لو عايز تضمن ادخل عدد براحتك من الامتحانات لأنك بتروح قبل ما تعرف نتائج الكلية وقبل التنسيق
بالنسبة (لفنون تطبيقية) بيأهلك لكل الاقسام لانك بتدخل اعدادى وبعد كدة بتتاهل على حسب تقديرك ل14 قسم وتنسيق القسم الداخلى بعد اعدادى وعلى فكرة تطبيقية مش فيها قسم عمارة ولكن فيها ديكور بيسموه هناك (تصميم داخلى واثاث) ودة بياخد اعلى تنسيق ومفيهوش تخصصات (عكس فنون جميلة ديكور من اعدادى وفيه شعبتين)

بالنسبة (لتربية فنية) و(نوعية) امتحانهم سهل جدا وبيأهلك للكلية نفسها
طبعا خلى باااااااااااااالك ان امتحان القدرات لازم تكون مخلص 3 ثانوى ومينفعش بعد كدة تمتحن قدرات (بيكون مرة واحدة بس وعدد براحتك من الامتحان عايز تمتحن فنون جميلة وتطبيقية براحتك بس هتمتحن كل امتحان مرة واحدة فقط وفرصة واحدة فقط) والامتحان بيكون قبل متكتب التنسيق

4/ إزاى أقدم فى إمتحان القدرات؟

بص انت هتابع القسم معانا والجرائد وهيعلنوا عن مواعيد سحب استمارات امتحانات القدرات وبتكون بعد انتهاء امتحانات الثانوية العامة بايام واحيانا اسبوع او اكثر
ف لما يتم الاعلان هتحجز امتحان القدرات من خلال موقع التنسيق بتاعك وبياناتك وتسجل الاستمارة وتختار ميعاد امتحانك اونلاين ودة احسن واوفر بكتير من النظام القديم ولازم تاخد كورس لان الامتحان بعديها ومفيش وقت وتابع الجرايد وقت بوقت لحد ما يعلن الوزير مواعيد الامتحان بالحروف الابجدية قبليها بفترة واياك تروح قبل ما يعلنوا مواعيد امتحانات القدرات
ملحوظة مهمة جدااا: طبعا فى مشكلة هتسمعها دايما انك هتقرا فى الاخبار والجرايد يقولك اعلان مواعيد امتحان القدرات ودى جميلة غلط, لانها بتبقى مواعيد سحب استمارة امتحان القدرات, والامتحان الطالب هو اللى بيحدده لما بيقدم فى الكلية وليس مواعيد امتحان
ونصيحة منى قدم واسحب استمارتك فى مواعيدك واخلص ومتستناش مجموعك ولا تستنى, لان الامتحانات لما بتخلص مش بتتعاد تانى, ولو الميعاد فاتك خلاص راح عليك للابد ومش هينفع تعمل تحويل للكلية
واحنا فى المنتدى هننزل كل حاجة قبليها فى المواعيد المناسبة.

فيه كورسات جامدة جدا ودى احسن كورسات عن تجارب كتير, تبع دكتور في الكلية احمد رشاد ممتاز جدا ولكن الكورس برة الكلية فرعهم فى العباسية وبس شغالين من زمان, وهيبدئوا السنة دى بعد الامتحانات مباشرة ركزوا معاهم جدا, لانهم بيعلنوا كل المواعيد قبل الامتحانات وبيظبطوا كل الامور انا نفسي بتابع معاهم المواعيد وبيساعدوا الناس فى امتحان القدرات وناس كتير بتنجح حتى لو مش بتعرف ترسم
وبسعر كويس ورخيص جدا واحسن من اى اماكن تانية لان الباقى بيعملوا حصة وحصتين ومكثف ودة رسم محتاج تدريب وحصص واطول الحصة معاهم 6 ساعات وبيتحاسبوا بالحصة وبيكملوا كمان ع النت 24 ساعة للكورس, انا نفسي كنت معاهم ونجحت ودى صفحتهم احسن كورسات بيقدموها بتضمنلكوا امتحان القدرات اضغط هنا لمتابعتهم واخبار القدرات اول باول ودى استمارة حجز عاملينها ببلاش لانهم هيبدئوا اول ما تاخدوا اجازة الثانوية العامة من هنا

5/ ايه طيب نظام الامتحان بالنسبة لعمارة فنون جميلة؟؟

فى (فنون جميلة حلوان) بس
امتحان عمارة ملوش علاقة بانك تكون رسام او لا لانه عبارة عن رسومات هندسية ومناظير نقطتين او نقطة او كروكى بظلال ونور ((وفى اخر سنتين)) فى الزمالك جاب شبكة مرسومة بمنظور وطلب رسم مجسمات هندسية زى مكعب او هرم وبالتكرار وبالتظليل وسؤال تحليل هندسي سهل جدااا
بيجبلك سؤالين اول سؤال رسم بمنظور هندسى بيطلب منك ترسم بوابة مدرسة تجمع مبانى سكنية ودة رسم بالمسطرة واقلام رصاص 3b/ 6b واول ما الاجازة تيجى هنشرح على المنتدى ازاى ترسمه
لكن باقى الاقاليم بيمتحنك فى منظور نقطة ونقطتين وسؤال نظرى
اما بالنسبة لاسكندرية والمنصورة والمنيا واسيوط بيجيب مناظير داخلية او خارجية نقطتين او نقطة

وساعات بيديك صورة مثلا للاهرامات او باب النصر ويقولك حلله هندسيا فهترسمه منظور بسيط وتحوله لكتل معمارية وكمان ساعات بيقولك ارسملى مجسمات جنب بعض مش متكررة كتير وظللها

تانى سؤال دة عبارة عن الثقافة المعمارية ومتتخضش من كلمة ثقافة دة عبارة عن سؤال نظرى ملوش علاقة باى رسم بيجبلك 4 صور وانت بتقول ايه الصور دى وبتكتب معلومات عنهم وغالبا بيبقى فى كتاب مش بيتغير بقاله 200 سنة

مثلا صورة الاهرامات وانت تكتب كل اللى تعرفه


6/ طب ايه نظام امتحان قدرات فنون لفنون جميلة؟؟
فى حلوان[/
امتحان فنون يعتبر زى امتحان عمارة بس عايز تركيز
ومحتاج تمرين
عبارة عن 4 اسئلة
اول سؤال هيجبلك تمثال وانت ترسمه بالرصاص وتظلل وساعات اشكال وتكوينات ازايز وقلل وستارة
وبيجيبوا تماثيل لاشخاص من حجر ومطلوب رسمها بالتظليل ودى مش صعبة على فكرة
اما امتحان فنون جميلة فنون المنصورة واسيوط والمنيا بيجيبلهم طبيعة صامتة قلة او ازازة او فواكه وتفاح وخضار ويرسموه بالرصاص
اما امتحان فنون جميلة فنون اسكندرية بيرسموا طبيعة صامتة فوق كرسي

تانى سؤال ودة مهم وبييجي فى كل امتحانات فنون جميلة وتطبيقية وتربية فنية ونوعية عدا عمارة طبعا هيقولك صمم كارت 14 فى 20 (مثلا) عن ترشيد المياة بالالوان (تصميم ابتكارى)
هتجيب الوان خشب معاك ودة زى رسم اولى حضانة سهل مش محتاج منك اى مجهود غير القدرة على تخيل بسيييييييييط برموز معبرة عن التصميم زى الدعايا والاعلان وخلى بالك السؤال دة بييجى فى كل الامتحانات حتى تربية فنية ونوعية لانه سؤال مهم جداااااااااااا

تالت سؤال ثقافة فنية عن اى معلومات عامة عن المتاحف الفنية مثلا او المدارس الفنية (زى بتاع عمارة كدة)
ورابعا بيجيبلك سؤال نحت بطين اسوانى عن اى موضوع مثلا الامومة او جسم رياضى ودة بالتدريب مع احمد رشاد

رابع سؤال فى حلوان والمنصورة نحت وبيقولك عايز بالطين الاسوانى اى شكل والمواضيع محدودة

طبعا امتحان فنون تطبيقية بيبقى 3 اسئلة اولهم مناظير هندسية بسيطة بنقطتين والسؤال التانى رسم تكوينات ازايز او اشكال هندسية بتظليل وتالت سؤال تصميم ابتكارى زى ما قولنا قبل كدة

امتحان تربية فنية ونوعية بيبقى سؤالين اولهم تصميم ابتكارى زى ما قولنا والتانى تعبير فني او رسم حر فى ربع فرخ عن اى موضوع زى مثلا التلوث او كدة وبتعبر عنه رسم كبير فى الورقة كلها بظلال ونور

الامتحان وقته طويل جداااااااااا 4 ساعات واكتر كمان ولو رسمت بالرسم المريح دة هيتبقى معاك ساعة او نص ساعة اهم حاجة متكونش مستعجل ابدااااا وسيبك من الغش وانك تساعد حواليك لانك هتضيع وقت جامد

وباذن الله متخافش من الامتحان لانه كويس وجميل بس عايز تركيز شوية ومش محتاج موهبة اوى يعنى بس محتاج تدريب كويس وصح وطبعا بنحذركم من الكورسات اللى اى كلام ويقولك حصة وحصتين ومكثف لان دة امتحان رسم وعملى مش نظرى وبتكتشف انك ضيعت فلوس ع الفاضي واضمن كورسات اللى قولتلكو عليها قبل كدة

7/ طب ايه مستقبل الكلية؟

كلية فنون جميلة: بالنسبة لعمارة ممكن تاخدها تمرين لو عايز تدخل هندسة ولو مجموعك فرق على درجتين تلاتة اقل من هندسة قدم عمارة وبتاخد نفس الشهادة وبتبقى تبع نقابة المهندسين ومستقبلها احسن من هندسة عمارة لانك بتدرس جانب هندسى وتذوقى وفنى يعنى قدرات ذات طاقة دفع ثلاثية
بالنسبة لديكور لو مجموعك اقل من هندسة ب 15 درجة مثلا بتقدم ديكور وبتدرس نفس مواد عمارة بس عمارة داخليه وبتكون مهندس فنان ومش شرط دخولها موهبة بس ديكور اقل من عمارة فى انها متتبعش نقابة المهندسين للاسف مع انها كانت تتبع بس قريب باذن الله هتتبع النقابة ومستقبلها ممتاز جدااااااا برة مصر وجواها وحاليا تتبع نقابة هندسة الديكور وتقدر تكتب لقب مهندس فى البطاقة بدون اى مشاكل لديكور

عدد مهندسين العمارة اكتر من مهندسين ديكور احسبها انت مع نفسك
باقى اقسام فنون محتاجة موهبة اكتر من عمارة وديكور علشان فرص العمل تكون زيهم او اكتر انما عمارة وديكور مش محتاجين موهبة اوى
وديكور بيدرس مواد هندسية ومواد فنية زى عمارة فى حاجات
يعتبر قسم الديكور اسمه البديل عمارة داخلية وتصميم داخلى وبيخرج لقب مصمم معمارى وهندسى وديكورى وداخلى
وقسم جرافيك مش مجرد رسومات بالكومبيوتر وخلاص انما هو عبارة عن رسم بالسيراميك مثلا وبالتطبيقات والادوات والخامات وبيدخل فى تصميم الدعايا والاعلانات وكل الحاجات الثرى دى والفوتوشوب ومحتاج موهبة
اما بقى لكلية فنون تطبيقية اقسام ممتازة لانها عملية جدا متقلش عن فنون جميلة طبعا ولا تزيد بس تطبيقية بتهتم بالجانب التطبيقي اكتر من فنون جميلة بتهتم بالجانب المجالى والفنى اكتر
وبالنسبة لتربية فنية ونوعية مفهومين غلط لانه مش بيجبرك على انك تكون مدرس ولكن ممكن تطلع فنان تشكيلى وبتختار فى الكلية عايز قسم تربوى للتدريس ولا تثقيفى للفن




8/ايه ترتيب اقسام فنون جميلة من حيث الافضلية للطالب المتوسط؟؟

أ/ عمارة- مجموعها اقل من هندسة بفروق بسيطةجدا -افضل من هندسة معمارى نظرا لدراسة الجانب الفنى.


ب/ديكور-مجموعها اقل من عمارة بقليل ولو عايز ديكور بتدخل امتحان قدرات فنون فنون ومش عمارة -دراستها مستمدة من عمارة ويمكن بالكورسات توفر فرص عمل عمارة لديكور يعنى تشتغل مهندس معمارى - علمى فقط ماعدا جامعة اسكندرية وفيها تخصصين على حسب رغبة الطالب اول تخصص هو عمارة داخلية ودة بيدرس كل انواع التصاميم لو الطالب حابب جانب هندسى اكتر- وشعبة فنون تعبيرية لو الطالب حابب الجانب الفنى اكتر ودة تصميم ازياء وديكور مسرح وتليفزيون وسينما وبيخرج مهندسين ديكور ومصممين عمارة داخلية وكمان شغل ديكور قوى جدا ومضمون لان الطلبة بتاخد خبرة قوية جدا فى الجانب الفنى والهندسى يعنى م الاخر ديكور بيدرس كل اللى الاقسام بتدرسه وعلشان تدخل قسم ديكور لازم تمتحن قدرات فنون مش عمارة وتكون علمى والكلية بتخليك فى قسم ديكور من اعدادى يعنى تقدر تقول ان ديكور شامل كل الاقسام

ج/جرافيك- محتاجة موهبة وحب مجال - ادبى وعلمى

د/تصوير - محتاجة موهبة وحب مجال - ادبى وعلمى

ه/نحت - محتاجة موهبة 100% وحب مجال اكتر - ادبى وعلمى

والترتيب دة بالنسبة للطالب المتوسط الموهبة اغلب الناس انما لو واحد موهوب فى الجرافيك مثلا يبقى الترتيب بالنسباله مركز اول جرافيك وهكذا

9/ ازاى بعرف الاقسام فى الكلية؟

لعلمى:
عمارة وديكور قسمين مختلفين من اول سنة بيتم دراستهم اعدادى(اعدادى ديكور وفيه اعدادى عمارة) يعنى كلهم 5 سنين زى هندسة بالظبط وتنمح شهادة بكالريوس فنون جميلة قسم كذا وتقدر تشتغل فى اى مكتب او موقع هندسى بسهولة
ولاحظ انك لو امتحنت فنون جميلة فنون وانت علمى بتدخل اعدادى ديكور مش اعدادى عمارة
ولو انت ادبى هتدخل اعدادى فنون وتانى سنة تتاهل لتلات اقسام (جرافيك او تصوير او نحت)

ادبى:
بتدرس الاول اعدادى فنون يعنى بتدرس جرافيك ونحت وتصوير ووبعد اول سنة بيتم اختيار القسم سواء بتقدير او التقدم بطلب

جامعة الاسكندرية اصبحت تمنح قسم الديكور لادبى من اول سنة شرط ليها تنسيق داخلى اعلى من مجموع الكلية الادبى بس خلى بالك لو قدمت ديكور فى اسكندرية مينفعش تعمل تحويل لحلوان لاى سبب مهما يكن

جامعة حلوان بياخدوا علمى بس فنون فى ديكور وعمارة ليها تنسيق لوحده

اما فنون تطبيقية بتدرس اعدادى وتانى سنة تتاهل ل 14 قسم على حسب تقديرك والتنسيق الداخلى بعد نتيجتك ف اعدادى

طبعا كل سنة يعملوا كلية جديدة ودلوقتى بقى فيه فنون جميلة حلوان/اسكندرية/المنصورة/المنيا/اسيوط/الاقصر

اى استفسااااااااااااااااااااار اسالوه هنا وشكرااا اتمنى انى اكون قدرت افيدكم